‘Riekdom maekt de soep niet lekkerder’, de ni’je verhaelebundel van Freddie de Vries (1959) uut Hooltpae, wodt zaoterdagaovend 13 april om 20.00 ure prissenteerd in kefé De Rustende Jaeger in Hooltpae. Et boek wodt uutgeven deur de Stellingwarver Schrieversronte en gaot €15,95 kosten. Et boek is te koop www.stellingwarfs.nl en in de boekewinkel.
Freddie de Vries is een echte man van de Stellingwarven. Hi’j is een netuurmeenske die him inzet veur behoold van de netuur en de cultuurhistorie van de streek. Dit vien ie riegelmaotig terogge in zien ofwisselende verhaelen. Veerder geft hi’j al jaorenlang exkursies in de Stellingwarfse netuurgebieden. Daornaost zit hi’j bi’j een stokmennig verienings in zien dorp Hooltpae. Veural bi’j de voetbalclub VVO, waor as een hiele flutte ‘De Vriesies’ bi’j betrokken binnen, is hi’j vaeke te vienen. In dit boek mit mar liefst 44 verhaelen gebeuren weer allerhaande vremde dingen en bi’jtieden weej’ niet waor as et op uutdri’jt. Mar dat maekt et lezen d’r van ok wel daj’ ni’jsgierig binnen naor et aende van zoe’n kruderig verhael waor as vaeke ok nog zien ‘dreuge’ humor om de hoeke kieken komt.
Hieronder ien van Freddie zien verhaelen
Weeromme naor de wottels

Ik weet dat ik een oolderwets mannegien bin en hebbe dan ok muite om alle ni’jigheden te volgen. De ni’je tied gaot raozendvlogge en de veraanderings volgen mekaer an ien stok deur op. Ok daenk ik dat deur al die komputers de perduktie in hiel wat bedriefstakken in feite niet omhogens gaot. Kiek ok mar es naor de zorg en et onderwies. Daor bin ze hielemaol deurscheuten in et invullen van pepieren en dat vret tied. Gelokkig kommen ze d’r now aachter en kun ze wat meer tied en andacht an de patiënt en leerling besteden. Misschien kennen jim de fabel van de miere en de lieuw wel. Bi’j dit verhael komt et d’r simpelweg op daele dat d’r hieltied meer meensken mekaer gaon konterleren en dat d’r steeds minder passeniel komt, die et ‘echte’ wark nog doen. Hiel veul baenties bin ‘locht’ en hebben allemaol ingewikkelde Engelse naemen. Hoe ingewikkelder de naeme, des te hoger is vaeke de loonschaol. Lestdaegs heurde ik ok weer een ni’je Engelse term: bore out. Dat is krek zo iets as een burn out mar dan hej’ niet te hadde warkt, mar juust te min. Ie vervelen je dood op et wark en willen dat dan ok niet dat aeren dat deur hebben. Et moet toch ok niet gekker wodden. Ok bi’j mi’j op et wark zie ik honderden meensken aachter de komputer zitten en die prodeceren feitelik niks. Bovendien verdienen ze meerstal meer dan de man-vrouw in de febriek. Neffens mi’j moet de betaeling aanders en moej’ de ambachtsman-vrouw en de perductieman-vrouw meer gaon betaelen. Iederiene wil heden-ten-daege wel aachter de PC en gieniene wil meer om zeuven ure morgens in weer en wiend een mure metselen of een fiets of auto repareren, want daor kriej’ smerige hanen van. Wel zie’k al die meensken die aachter de PC zitten aovens mit de auto naor de sportschoele gaon, want 15 ze gruien haost allemaol dichte. We moe’n weer naor baenen zonder poespas en aandere fratsen. Eerlik wark mit de hanen! Een kezemaeker die de wrongel mooi glad striekt mit de harke. Ja, en dan vaalt d’r wel es een zwietdruppel in de draineerbak. Zokke ambachtelijke keze mag weer naor zwiet roeken en smaeken. Alles moet feitelik weer kleinschaoliger en uut de buurt kommen. Gien gereis meer mit vee en melk en gruunten. Allemaol weer gemingde bedrieven mit koenen, varkens en akkerbouw. De keze, et vleis, brood en gruunte wodden weer plaetselik verwarkt. Ok bruken we dan gien gifrotzooi meer, want daor kriej’ toch vroeg of laete de rekening van prissenteerd! Zo kriegt zoe’n perdukt weer de smaek van de streek. André van Duin zong ok al es: ‘En de bakkersvrouw rolt door het deeg.’ Zok brood mit hadde kosten dat smaekt toch vule beter dan dat komputergestuurde brood dat bi’j duzenden van de baand of ruult. Et is brood zonder kerakter! Weeromme naor de wottels. En now ik toch bezig bin, dan leveren we, wat mi’j betreft, morgens de tillefoon in bi’j de portier. Niks gien geloer meer op dat ding en weer gezellig praoten in et schoft. En veur de baos zal et ok geunstig uutpakken, want neffens mi’j is de tillefoon et ni’je roken. D’r bin al hiel wat meensken verslaefd, en dit wodt een groter perbleem dan dat we in de gaten hebben. Ofslutend van mien belerend praotien wo’k zeggen daj’ beter wat iel in de hanen hebben kunnen dan vierkaante ogen van et komputerschaarm.
Freddie de Vries